近年好多政府部門同機構將市民私隱通街丟，前日又爆出香港科技學院學生資料撒滿街，講到尾都係私隱教育做得唔好，李衞一心揪呢個專員教訓，點知……

李衞：專員，依家又有市民私隱任睇喇，仲唔反省？

專員：好抱歉，當部門、私人機構或者市民洩露私隱之前，點樣處理私隱，係佢哋嘅私隱。

李衞：耍太極？一單又一單，唔通私隱署冇諗過點改善社會風氣咩？

專員：宏觀啲嚟講，私隱署有冇諗嘢都係私隱署嘅私隱，所以署方一定要捍衞私隱，唔會透露。

李衞：可怒也！你呢個專員，咁冇社會責任，點解仲坐住呢個位？

專員：呢個問題有質素。（耳語）我點解坐住呢個位，其實係政府嘅私隱。政府嘅私隱，一般都係凌駕知情權，不可說，不可說。

李衞：唉，唔怪得香港變成私隱大災區，真係多得你唔少……

第一手消息請下載on.cc東網iPhone/iPad/Android/Windows Phone Apps