政壇：搞搞政：貪湯謬論入選聲音榜
點樣可以出位？政圈中人好多時都係靠Sound Bite（精警發言），當中部分發言可能係譁眾取寵，但亦有唔少係真心謬論。有電台搞嘅每年一度嘅聲音檔案選舉，市民喺網上投票選出最具代表性、印象最深刻嘅十大聲音片段，「貪湯」前廉政專員湯顯明有錯會認嘅片段亦上榜。
設計圖片及對白
市民選出嘅十大聲音檔案之中，香港電視網絡主席王維基嘅「邊個最大」、教師林慧思事件同財爺鬍鬚曾話飲咖啡、睇法國電影就係中產嘅聲音檔案就分列三甲。
至於任內狂買茅台同烈酒、破壞香港廉潔聲譽、打爛廉政公署金漆招牌嘅「貪湯」前廉政專員湯顯明，喺立法會帳委會聆訊後見傳媒，話「壓力係，有嘅，係大。若然，調查，研訊，發現，湯顯明係錯嘅，錯要承認，亦都有，承擔責任。我，一路以來相信，香港係公正嘅，不過我相信，依家，將來，我都相信。」呢段有錯會認嘅片段就排名第四。雖然貪湯已被帳委會痛斥譴責，但厚顏嘅佢至今仍然未道歉，難怪市民會選出呢段聲音檔案，提醒佢有負廉署同香港人。
最出乎意料嘅係侯志強今年七月喺立會發展事務委員會公聽會上力撐發展局局長陳茂波嘅「廢人論」，佢話：「如果一個到四、五十歲，一啲物業都冇，乜都冇，呢個人都係廢人嚟o架啦！係咪？仲配咩做局長吖？」竟然打入第十位。不過，都係嗰句，就算發言點出位都好，都唔代表言論合理同受歡迎嘅。
