政壇：民陣遊行愛字派挑機

民陣將於下周三元旦日發起爭取普選遊行，主辦單位預計最少會有五萬人參加。與此同時，愛國團體愛港之聲將會喺當日下午喺政府總部發起「愛香港、繼續撐政府」嘉年華。表面上支持政府同反對政府兩派似乎唔會有任何衝突，但保衞香港運動發起人傅振中就透露，佢哋將會喺民陣遊行期間擺街站「挑機」，順手收集支持政改方案要符合《基本法》同全國人大常委會決定嘅市民簽名，喺諮詢期內轉交畀政府。

傅振中話保衞香港運動將於元旦下午三點至五點喺灣仔軒尼詩道擺街站，被問到係咪特登同民陣打對台，佢就以「無理由畀佢哋霸晒成條街」為由作回應，又話佢哋嘅成員唔會故意挑釁遊行人士，但就覺得大家要學習表達民主訴求，唔好動輒掀起罵戰。