傳統智慧話男仔喺情感方面偏向積極進取，女仔就比較保守穩定，原來呢個道理放諸投資亦然，咁啱睇咗份今年嘅淘寶基金網上理財報告，話男性用戶最鍾意買值博率高嘅股票型基金，女性用戶就最鍾意買回報穩定嘅貨幣型基金。
不過，保守還保守，報告話女性一睇啱就會重錘出擊，捉住唔放依然係女性特色呀！雖然男性用戶論人數同網上理財宗數都超過女性，但計上人均單宗理財金額，女性出手就闊綽得多，平均每宗交易都高過三百九十一元o架！
唔單止男女嘅消費模式唔同，原來唔同星座、地區都會影響消費模式個喎！份報告仲話，天秤座同天蠍座係十二星座入面最鍾意喺淘寶基金平台上理財，白羊座最保守；廣東、上海、浙江、江蘇就最興理財，而北京、上海、廣州用戶理財金額仲係最高添！
據聞全國有二十個淘寶村，一萬五千間淘寶網店，創造六萬人直接就業，搞到依家愈來愈多農民發展網上生意。
第一手消息請下載on.cc東網
