鄭家豪（左起）、陳婉珊、余嫿及甄韋喬齊走近失明人士的世界。（受訪者提供）
陽光勵進會創會社長兼黃大仙區議員Roy丁志威早前聯同青年團體「青藝」舉辦嘅體驗視障之旅，號召城中一班政商界傑青到美孚「黑暗中對話」體驗館，齊齊接受四十分鐘「失明」體驗。
丁志威話喺農曆年後再搞一場「摸黑食開年飯」視障體驗活動。（受訪者提供）
廠商會展覽服務有限公司副主席Stella李慧芬、十大傑青甄韋喬、時裝設計師Mary余嫿、合和項目拓展業務發展經理鄭家豪，青年工業家獎得主陳婉珊同萬希泉鐘錶董事長兼創辦人沈慧林等人，齊齊走入伸手不見五指嘅黑暗館內，由視障導賞員帶領，感受唔同場景，包括過馬路、行街市同購物等。
喺黑暗中每個動作都好似迷失方向，好似Mary行到口渴，想話買罐汽水潤吓喉，好唔容易摸黑拎到張銀紙出嚟，卻唔小心將汽水倒瀉咗。沈慧林買紙包飲品時不慎跣手，銀包都跌埋，遍尋不獲，惟有大叫求助，叫同行好友幫佢摸黑搵銀包。Stella買飲品時都跌咗幾蚊，認真無奈。渾身肌肉嘅鄭家豪初嘗用「盲公竹」行路，感覺戰戰兢兢。完成黑暗館之旅，眾人都大呼啟發良多。
阿Roy話準備農曆年後Encore，叫齊名人喺黑暗館摸黑食開年飯，一嘗摸黑夾餸，用味覺感受食材真味。佢亦呼籲社會更多幫助失明人士，例如考慮將「八達通」裝上發聲功能，能讀出餘額，好讓視障人士買嘢時，清楚知道被扣咗幾多錢，咁就Fit晒喇!
第一手消息請下載on.cc東網
