政壇：馬逢國補鑊整色整水
香港電視網絡早前不獲發免費電視牌照，搞到滿城風雨，泛民主派仲計劃引用《立法會（權力及特權）條例》調查事件，以致政府出手箍票，令多名建制派功能界別議員成為磨心，不停被追問投票立場。其中同電影業界有關嘅體育、演藝、文化及出版界議員馬逢國，相信係最難為嗰位，佢投棄權票更惹來不滿聲音。
設計圖片
佢尋日就《施政報告》同《財政預算案》提出意見時，特登有一段寫明要「推動免費電視市場發展」，莫非想借機會補鑊？
回想當日，留守政府總部嘅港視員工將班議員投票取態貼晒出嚟，有議員經過又被追問投票立場，未定意向嘅議員，相信每日行經都提心吊膽，免得過都避之則吉。馬逢國就應該冇得逃避，皆因佢就係代表電視業界嘅議員，呢單嘢冇得唔表態。佢一開始話正反意見都有，未肯表態，連演藝人協會等業界組織都要發聲明要佢辭職，但係到最後先至講明唔會支持，但又話政府解釋不足，所以投棄權票，被人批評佢係騎牆派。
將矛頭指向政府
馬逢國喺建議書上，除例牌要求政府兌現承諾成立文化局、設立體育專員，同埋檢討活化工廈政策、增加體育文化界嘅資源同人才培訓，仲講番佢老本行，發展電影後期製作中心之外，仲有一項係「推動免費電視市場發展」。佢話政府未能就發牌事件上作出有說服力解釋，令人遺憾，但轉頭又要求政府要向其餘兩間原則上獲批牌照嘅機構盡快發正式牌照，又希望喺新牌照列明加強製作或採購本地節目，推動本地獨立電視製作發展。
馬逢國除咗為投棄權票嘅整色整水補鑊之外，仲將矛頭指向政府，唔通識得小說中嘅武功「乾坤大挪移」？
