單車徑危機四伏 運輸署靠害市民
自從香港出咗一個「單車王子」黃金寶，再加上一個「牛下女車神」李慧詩，單車運動愈來愈受歡迎，愈來愈普及，成為唔少市民假日嘅消閒活動。不過咁，消閒還消閒，最緊要注意安全，提防陷阱，否則，隨時樂極生悲o架！
唔係危言聳聽，由於官僚做嘢求其，敷衍了事，搞到唔少單車徑設計失誤，危機四伏，踩單車隨時踩出禍。邊條單車徑咁恐怖？將軍澳海濱長廊單車徑咪就係其中之一囉。政府為咗開發將軍澳南部，耗資億元興建海濱長廊，諗住打造區內新蒲點，點知新蒲點暗藏新黑點，單車徑陷阱處處，意外頻生，去年首期啟用至今年幾，已經先後發生十三宗單車意外，造成七人重傷，你話係咪靠害吖？
咁多人中招，唔使問阿桂，單車徑梗係設計有缺陷喇。本報記者實地視察過，發現至少潛藏三大危機。危機一，落斜路面好多直剷迴旋處、行人過路處或者急彎位，除非閣下有黃金寶或者李慧詩嘅身手喇，否則分分鐘煞車不及，撞到四腳朝天；危機二，路面無故收窄，萬一多車狹路相逢，互不相讓之下隨時「火星撞地球」；危機三，欠缺分段路牌指示，一旦有人受傷叫白車，亦難以講出確實位置，延誤救援。一條咁多缺陷嘅單車徑，唔怪得咁多人中招喇。
所以話，港產官僚食嘢唔做嘢，做嘢打爛嘢。長期以來，當局一直漠視單車徑需求，難得肯主動做嘢，點知慢工出劣貨，整咗咁多陷阱畀市民踩，唔係靠害又係乜吖？咁講啦，人命關天o架，各位運輸署大老爺，如果唔想車毀人亡，快快補鑊喇！
其實，單車徑陷阱多多，又點只將軍澳海濱長廊吖。呢，隨住沙頭角禁區喺上年二月局部解禁，沙頭角公路成為單車熱點，而區內嘅單車意外亦隨之勁升三成，單車安全引起關注。正如區議員話齋，沙頭角公路本身為雙線雙程行車，假日車多繁忙，根本不適宜單車行駛，要求當局喺區內興建單車徑，保障單車及其他道路使用者安全。
唉，小小單車徑問題，居然搞到甩甩漏漏，七國咁亂，大事做唔到，小事做唔好，你話港產官僚仲有咩用吖？唔好畀太一叮睇死，耗資十二億元興建嘅將軍澳室內單車場及運動場就快啟用喇，以港產官僚一貫求其嘅作風，隨時又爆醜聞o架。
咁又難怪嘅，港府渾渾噩噩，直頭好似蒙住眼踩單車，唔出事至奇。講到底，港產官僚靠唔住，各位千祈要記住，踩單車安全為上，自求多福吖，叮！
