聖誕過後，淫賤黎收咗唔少禮物，禮物堆積如山，淫賤黎突然慷慨大方同少膽虫講：「少膽虫！我收收埋埋咁多禮物，自己用都用唔晒，嗱，呢堆南韓最新出爐嘅面膜，你拎去畀大家用啦！」少膽虫聽到有着數，正所謂「執輸行頭，慘過敗家」，即刻飯應：「多謝腦細！腦細萬碎！」語畢，少膽虫擸埋啲面膜，出去試新嘢。

一小樽的面膜上印有「豬皮面膜－敷完變靚靚」的字眼，少膽虫毫不猶豫將面膜搽上面，攤响梳化度變靚靚。八卦嘅肥豪走埋少膽虫度：「返工流流敷面膜咁鬼歎……我又要！」少膽虫驚見肥豪講到出聲，原本諗住擸晒啲面膜自己歎，依家惟有畀肥豪歎埋一份，於是兩件肥豬肉橫瞓公司梳化上敷面膜，甚為壯觀。

「咦，呢隻咪係豬皮面膜……」少膽虫聽到菜嫌貴把聲，心諗呢次又要分啲畀人喇，菜嫌貴續說：「係就係好出名，不過出名細菌多，仲係用死豬製造，隨時毛囊發炎……」菜嫌貴都未講完，少膽虫同肥豪嚇到彈咗起身，撕走面上塊膜，少膽虫與肥豪對視，只見兩人之面變得脹卜卜、既紅腫又出紅點，兩人慘聲大叫。

少膽虫後知後覺，「腦細仇家多，禮物冇好嘢，今鋪搵着我塊面嚟搞……」

第一手消息請下載on.cc東網iPhone/iPad/Android Apps