SUN搞作：SUN官場現形記：單車危徑
將軍澳南海濱長廊耗資億元打造，李衞聽講沿住單車徑景色怡人，就去踩番轉散吓心，點知條單車徑斜路、急彎多籮籮，一個唔小心已經炒埋一碟……
李衞：哎吔！你唔見我落緊斜咩？仲要踩出嚟！
運輸署長：唓！我夠轉緊彎咯，又唔見你減速？
李衞：咦？你咪係運輸署長？好心你糾正番單車徑啲設計失誤啦，唔好害人害物！
運輸署長：雖然我啱啱先同你撞完車，但就令我對呢條單車徑更有信心！
李衞：又學埋呢啲語言偽術？
運輸署長：絕對唔係語言偽術！你諗吓，香港無賭場已經輸蝕畀澳門，唔快啲整番條鍊車賽道，點夠澳門砌？好在呢度都有個「髮夾彎」，夠危險，唔失禮！
李衞：你當呢度係賽道呀？好多人一家大細嚟玩o架，點可以咁危險？
運輸署長：鍊車就係要感受危險帶嚟嘅興奮，好似冼拿咁死喺賽道，先至係無上光榮……咦？做乜綁我喺路中心？
李衞：依家就等啲單車衝落嚟，帶畀你無上光榮啦！
