城中鏡：徐英偉帶化骨龍睇巨龍展
尖沙咀科學館正舉行「巨龍傳奇」展覽，唔少父母都趁假期帶同仔女到場參觀，民政事務局政治助理徐英偉（Caspar）尋日帶埋兩個囝囝去睇恐龍，一副奶爸打扮嘅Caspar帶住兩個「化骨龍」玩得好投入，仲同兩個囝囝喺恐龍前大擺甫士，之後又將張相上載互聯網，一於同好友分享。
徐英偉帶埋兩個「化骨龍」去睇恐龍展，玩得好開心。（互聯網圖片）
Caspar呢張喺場外同炳靈大夏機械巨龍嘅合照，影得好用心，三父子同巨龍都全部入鏡、睇得好清晰，Caspar將細仔孭喺胸前，大仔就攬住佢對腳，三父子啱啱形成一個高於一個嘅造型，Caspar仲擺個高舉雙手作狀扮恐龍嘅樣，分外溫馨。最特別嘅係，張相用咗濾鏡，睇起來黃黃哋，好有懷舊味道。
