城中鏡：陳南祿馬場舉機自得其樂
聖誕假期中，唔少名人出埠度假，留港過節嘅亦各有節目，尋晚快活谷有夜馬，好多名人都有現身，包括廣東社團總會主席王國強、「翡翠皇后」董吳玲玲、太子珠寶鐘錶主席鄧鉅明及馬會大董兼恒隆地產董事總經理陳南祿（Philip）等人。
陳南祿（右）在馬場內不停揸相機影馬匹，自得其樂。
喺五樓廂房食飯嘅Philip多次行出露台影相，不過佢影嘅唔係人，而係馬匹，無論賽程中定係衝線一刻，都見佢影到不亦樂乎。掛住影馬匹之餘，亦不忘與同行者談笑，招牌笑容不絕，佢透露，尋日係同家人入馬場，自己人唔使招呼，所以就自得其樂。尋日跑馬地一帶好大風，但Philip都只係着住西裝，冇戴頸巾，亦冇着大褸，好似無懼寒風咁，或者家庭樂暖笠笠啩。
