城中鏡：羅范疾走中環「秒殺」化妝品
年尾難得有幾日假期，平時繁忙嘅人都會趁機鬆吓抖抖。行政會議成員羅范椒芬日前獨自現身中環皇后大道中，見佢行色匆匆，過馬路時眼見附近冇車駛來，就唔理係紅燈定係綠燈都照衝可也。咁匆忙，羅太唔通趕緊咩活動？睇真啲，又唔似，原來羅太趕住去買化妝品！
拎起化妝品就即席塗喺隻手度試試。
羅范椒芬在中環急步過馬路。
一邊落樓梯離開，一邊將信用卡放番入銀包，睇嚟都幾趕。
黑衣套裝低調「濕平」
呢日下晝約三點幾鐘，我哋喺中環見到羅太過馬路後，隨即急急腳直上大型連鎖化妝品專門店一樓「濕平」，羅太先喺店內巡視一圈，最後駐足喺一個法國化妝品牌專櫃前，拎起一支又一支疑似係粉底液嘅化妝品，即席就塗喺隻手度試試，仲同其他顧客一齊逼住問店員意見。羅太試上手嘅化妝品牌價錢非常大眾化，估唔到買嘢理應唔使睇價錢嘅羅太，平日消費都咁精明。
羅太喺店內一試就十分鐘，期間仲對護膚同眼影用品相當有興趣，而且好快就有斬獲。雖然羅太長期都係民調內五大最為人熟悉嘅行會非官守成員，但可能羅太當日以一身全黑套裝低調現身，附近嘅女顧客都似乎冇為意羅太嘅存在，而羅太付款後，未趕得切將信用卡擺番落銀包，已經急住落樓梯走人。
我哋趨前打聲招呼，羅太透露剛才只係買護膚膏，呢輪政府諮詢緊政改，羅太工作有冇增多﹖佢笑笑口話，政改唔使佢幫，仲講笑話忙就嚟唔到買化妝品喇。
