政壇：搞搞政：譚志源網羅五大商會詢政改
港府已開始政改諮詢工作，踏入明年一月政改三人組就會開始接觸團體，有工商界消息透露，嚟緊嘅一月七日，政務司司長林鄭月娥、律政司司長袁國強、政制及內地事務局局長譚志源會出動約見五大商會聽取政改意見，作為處理政改工作嘅政策局局長，譚志源喺前期諮詢已找上本地大型商會，明顯係想早啲摸吓商界底，畢竟有大嘅商會在前，有助佢哋一網打盡商界意見。
設計圖片
各自想「主場」舉辦
今次五大商會政改諮詢會預料會有四百多名代表出席。有商界人士形容，政府收集政改意見係其次，估計係想擺出一副重視商界嘅姿態，以獲取商界支持政改，所以一次過舉辦論壇諮詢晒五大商會。呢五大商會除咗傳統四大商會，即香港總商會、中華總商會（中總）、工業總會（工總）及中華廠商聯合會（廠商會）外，仲有近年崛起嘅中華出入口商會（中出）。工總主席劉展灝話，工總理事會曾經非正式探討過政改意見，初步總結兩大意見，一是希望保留立法會功能界別議席，以免削弱工商界嘅聲音。另一方面就係希望喺普選特首目標踏出第一步，即使只係一小步，也好過原地踏步。
總商會方面，據聞都想同政府力陳功能界別嘅重要性；而廠商會中人就話，佢哋傾向「先聆聽、後發表意見」，好想政府解釋一吓提名委員會嘅「民主程序」，到底有咩框框。
不過，今次諮詢會據講過程中發生咗唔少插曲，首先係諮詢會嘅舉辦地方，因為各大商會都想喺自己「主場」舉行，經過一輪「協商」才敲定喺港島香格里拉酒店舉行。
