政壇：走音咪霸周一鑊出醜
年尾多酒會應酬，啲高官日走幾場都唔出奇。曾經參加今屆立法會選舉嘅人民力量「星屑醫生」歐陽英傑，尋日喺社交網站講到佢嘅酒會見聞就好得意，唔講唔知，星屑醫生曾經擔任四至五屆西醫工會周年聖誕派對司儀，招呼過前任食物及衞生局長周一嶽（周一鑊）同現任局長高永文，星屑醫生仲爆佢哋兩個風格好唔同，高永文好似怕醜小生咁，去到酒會都唔太情願開金口；但周一鑊就係另一個典型，「金口」常開。周一鑊唱歌唱到走晒音係眾所周知嘅事，只係估唔到佢霸咪往績咁多啫。
設計圖片及對白
高永文似怕醜小生
星屑醫生話，高永文嘅歌喉有番咁上下，但佢就似乎非常怕醜，唔肯一個人企喺台上清唱，要拉住其他司儀陪唱，於是眾人就合唱一曲《朋友》。佢又憶述周一鑊出席派對嘅時候，雖然佢會叫對方唱兩首歌就好行返落台，但台後例必會預留多兩首歌嘅時間，因為周一鑊一定會「安歌」唱完又唱唔肯擺低支咪。
其實周一鑊嘅歌藝已唔止一次出醜，但好多場合都仍然見佢攬實支咪，堅持自娛，唔怕獻醜，真係難為主辦方同台下來賓嘞。
講番最新一次西醫工會派對，當晚出席者除有高永文外，仲有副局長陳肇始、港大醫學院院長梁卓偉、醫院管理局新任主席梁智仁等。星屑醫生話，工會原來諗住邀請高永文上台致詞，但對方一聽到要講番兩句就耍手擰頭，話自己出席只係為咗玩，無諗住搶鏡。既然高永文唔肯致詞，星屑醫生就改為叫佢上台唱歌，但高永文初時都係不太情願，最後只喺半推半就下上台唱番兩句。
