集體秘撈受處分 點解消防大細超

話說二十八名消防員早前被揭發集體秘撈，多次未經申報擔任珠寶展保安員，東窗事發後，廉政公署一度介入調查，最後雖然證實不涉刑事成分，但就將事件轉介公務員事務局及消防處定奪。正所謂，上樑不正下樑歪，成件事據說係有消防局中層官員懷疑做兼職保安「蛇頭」，安排下屬秘撈。

本來呢，錯就要認，打就企定，消防員違規秘撈梗係要接受懲罰喇，奇就奇在其中五名未過試用期嘅消防員被極速「炒魷」，而其餘二十三名員佐級消防員嘅調查就一拖再拖，直到最近先至落實處分，僅判以「譴責」，唔使炒魷不特止，連較重一級嘅「嚴厲譴責」都慳番，有處分等於冇處分。

法律面前人人平等，今次事件係消防處歷來最大規模嘅集體紀律處分，照計應該一視同仁，點解有啲人判極刑，有啲人僅受譴責呢？同一套公務員守則，新人同舊人嘅懲罰天差地遠，即係擺明大細超啫，叫人點樣心服吖？正如有前線消防員話齋，廿八人「罪名」相同，結果五名未過試用期嘅消防員罕有地被處以革職「極刑」，而其他正式入職人員嘅處分就輕得多，猶如輕輕打吓手板，令人感到「好唔公平、好冇公義」。

冇錯嘞，香港就話實行一國兩制啫，唔通消防處亦係一法兩制？其實，對於消防處嚟講，大細超已經唔係第一次嘅嘞。該處早前發出《總部行政通告》，列出過去一年有八十六人因違反紀律而遭處分，幾乎每百名消防員就有一人違紀，有人衰秘撈，有人當值時賭博，有人毆打同袍，有教官冇按時執教等等，簡直無奇不有，令人嘆為觀止。但奇怪嘅係，同一類違紀行為竟然有唔同處分，因人而異，毫無準則可言，咁樣嘅所謂紀律部隊，都算少有咯。

講真，近年消防處醜聞多多，形象衰到貼地，大家早就見怪不怪。呢，該處不務正業，通街都係消防安全隱患，佢哋視若無睹，但就以收到一封電郵投訴為由，派人上門滋擾傳媒，製造白色恐怖，打壓新聞自由，你話係咪唔衰攞嚟衰吖？計太一叮話齋，物必先腐而後蟲生，消防處管理混亂，內部腐爛，港府係時候大刀闊斧清除瘀血喇，叮！