香港特區的直升機家長，每日為子女奔波，捱凍寅夜排隊，買屋搬家，也只為BB可入讀心儀幼稚園，念頭係讓仔女「贏在起步點」！一群心慌意亂無助的苦主，又怎知道世事成敗不在乎開始，而係睇最終結果！

香港電視王維基傾全力去爭取免費電視牌照，在「一籃子」因素決定下，不獲發牌，但卻在全體員工瞓身（政總）打拚下，縱即佢不曾一次現身撐場，也可贏得「民主先鋒」的美譽，更凸顯力抗強權的英勇鬥士形象，頭頂有光環！

講真的，香港實在需要多幾個有質素的電視台嘅！最低限度，係讓港人有得揀嘛！在政治濫情的香港環境，連一間超市賣盤都係政治新聞時，何況一間涉及意識形態的電視台呢？若有人否認今劑發牌風波跟中央決定無關者，唔係無知呀！而係白癡！

日前，在蘇錦樑被急召北上面聖回港後，王維基失驚無神，宣布已成功收購有國企背景的中移動子公司，明年七月開台，做流動電視，除蘇錦樑公開說之前完全不知道，及王先生亦否認有跟中央商討外，家陣，江湖吹風，話連港澳辦和中聯辦事前對此交易一概不知喎！咁就真係天大奇聞矣！真唔知佢哋點做嘢？

王維基在申請牌照失敗後，一直話無Plan B，而其公司股價亦下滑。今趟突然「借屍還魂」重生，開party慶祝兼派錢，被員工爆料，話佢在股市日賺七億，唔知佢在事前這個多月內的股市買賣情況如何？證監會應否查究及關注吓呢？今日唔知聽日事，世局如棋日日新，好睇！好睇過電視劇！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android Apps