SUN搞作：少膽虫手記：狗人借錯狗
淫賤黎以為自己套《狗噏24》好收得，於是就叫少膽虫幫手，搞番個番外篇，少膽虫大惑不解，明明每集都請咁多囡囡返嚟「自爆」一啲唔係秘密嘅秘密，仲需要啲咩番外篇呢？「腦細，今次會唔會試吓請男嘉賓呀？」語畢，扮上等人食緊富豪飯堂外賣燒鵝嘅淫賤黎，將成舊鵝骨丟過少膽虫度，「死蠢！男人有咩好玩呀？我要吸引觀眾留喺屋企睇電視呀！」
少膽虫更加唔明，「腦細，我哋嘅hit-rate持續徘徊喺個位數字，點都鬥唔過奶媽台……」淫賤黎大聲夾惡咁話：「依家魔童搞『動』電視，以後我哋無獨家喇，我哋依家仲唔搞啲新嘢，等幾時？」少膽虫咁醒，梗係即刻靈機一轉，畀橋腦細啦，「黎黎，我哋一於參考人類文明發源地泡菜國，搞次穿越版《狗噏24》，搵隻古代狗同你一齊噏！」淫賤黎聽到，即刻拍晒手掌。
錄影嗰日，成個布景都充滿韓風，但見淫賤黎着住套韓服行出嚟，成個金正恩二世咁，深得民心。一陣狗吠聲傳來，少膽虫成竹在胸。突然，淫賤黎怒極大嗌：「賤虫，古代邊有金毛尋回犬？」少膽虫心頭一涼，望一望手上張動物演員通告，明明上面寫住唐狗喎……
