城中鏡：歐陽妙芝帶兩子樂園睇雪
聖誕節目多籮籮，唔少人會舉家外遊，由模特兒進身化妝界嘅歐陽妙芝近年就有個例行節目，就係帶兩個寶貝仔方玉丞和方玉亨入迪士尼樂園睇飄雪，佢話自○八年起，每年都會帶兩個囝囝到樂園過聖誕，入住酒店宿一宵，難得兩子不生厭。
歐陽妙芝同大仔方玉丞（左）、次子方玉亨（右前）每年聖誕都會入迪士尼樂園住一晚。
不過，今年佢哋嘅節目都排到密密麻麻，迪士尼樂園之旅揭開序幕後，跟住有多個小朋友聚會，然後又會到離島及出埠到馬爾代夫遊玩，節目排到明年一月初，認真盡興，但歐陽妙芝話佢嘅聖誕願望只係做一次全身按摩及可以有八個小時睡眠時間。
