城中鏡：陳恒鑌派「套」自己不設防
平安夜向來有失身夜之說，新界青聯智庫尋日喺旺角行人專用區向女士派發安全套，身為智庫顧問嘅立法會議員陳恒鑌（Ben）同召集人李世榮都有參加，智庫今年獲日本品牌贊助一千個超薄安全套，佢哋舉行呢項活動係要提醒女士「停一停、戴一戴、放心晒」，雖然唔少女士行過都怕醜耍手唔敢攞，但亦有女士伸手攞多兩個返去慢慢用。
陳恒鑌（右）趁平安夜落旺角派安全套，呼籲女士們「保護自己，要有一『套』」。
新界青聯智庫早前做咗個調查，接受訪問嘅四百多名十二歲以上嘅女性之中，有五成八都話曾經喺聖誕或假日發生過性行為，與其改變唔到現狀，做足安全措施都係穩陣啲嘅。已育有一女嘅阿Ben亦呼籲女性有責任主動採取避孕措施保護自己，以免「搞出人命」後患無窮。講到佢自己，佢就自爆明年開始夜夜不設防，皆因計劃追多個。
