城中鏡：劉展灝恨抱孫 致詞催仔快生
開心過聖誕！香港工業總會青年委員會日前舉行聖誕派對，工總主席劉展灝（Stanley）及前主席孫啟烈等前輩都抽空去同後生仔女一齊玩。
劉展灝（右）同陳嘉賢齊出席派對。
劉燊濤（左）及太太被催生仔。
家族做玩具生意嘅丁煒章（右）童心未泯，戴上公仔頭飾與顏明秀（左）合照。
孫啟烈（左二）湊孫女現身撐場。左一為孫榮聰，右一、二為孫榮良夫婦。
孫家鼎力支持呢個活動，孫啟烈大仔兼前青委主席孫榮聰（Eric）現身，次子孫榮良（Warren）更帶埋囡囡出席，Eric話，最近青委一班成員啱啱去完南韓訪問，近年韓風勁吹，無論係智能手機、護膚品或文化產業都備受矚目，佢哋就參觀咗當地享譽國際嘅手機廠、汽車廠及護膚品研發公司等。今趟旅程令佢獲益良多，亦睇到唔少商機，好似佢就試用緊一隻南韓護膚品牌產品，覺得好正，依家考慮緊做香港代理。
搞笑嘅係，Stanley一見到Warren同囡囡出席，即刻恨到出晒面，借致詞嘅良機吐心聲，盛讚Warren好支持人口政策，仲叫大家要「多產」。
新抱公司零食任吃
佢呢句話唔使講都知係講畀身兼青委副主席嘅大仔劉燊濤（Gary）及新抱吳奕筠（Daphne）聽喇！爸爸講到出面，Gary點接招呀？佢只係識笑唔識答。佢太太Daphne身形愈嚟愈Fit，真係羨煞旁人，點知佢呻話最近肥咗就真，事關佢跳槽到一間跨國社交網站公司，公司福利勁好，竟然有兩個超市貨架咁大嘅零食部任食唔嬲。佢仲話，好多同事都唔經唔覺肥咗，佢惟有請負責採購嘅同事買啲輕食。
當晚到場嘅仲有青委主席兼德國寶老闆陳國民嘅千金陳嘉賢（Karen）、玩具王國開達集團前主席丁鶴壽嘅囝囝丁煒章及中華廠商聯合會副會長顏吳餘英囡囡顏明秀等。
