伍華強（右）任地監局行政總裁唔夠兩年就辭職，勢成該局迄今最短任期的CEO。（資料圖片）
本港樓市正處調整期，負責管理超過數萬個地產代理嘅地產代理監管局（地監局）喺平安夜卻突然公布人事變動，做咗年多嘅行政總裁伍華強（Augustine）基於個人理由辭職，並將於明年三月正式離職，地監局冇交代佢嘅新去向，不過Augustine做咗地監局CEO只係短短一年零五個月，可以話係該局成立十五年以來任期最短嘅CEO。
地監局主席陳韻雲感謝Augustine過去一年多以來對該局嘅貢獻，並會盡快招聘，期望盡快搵到合適人選出任新CEO一職。Augustine做地監局CEO之前，服務咗政府超過三十年，對地政規劃亦相當熟悉，之前做過規劃署助理署長，其後提早退休離開政府，去咗做中央政策組政府城市規劃師，再調任西九文化管理局做過首任項目總監，之後再執掌地監局。
睇番過去幾位地監局CEO，首任CEO周陳文琬一做就做咗六年，而政務主任出身的陳佩珊同余呂杏茜，任期都有六年同兩年十個月。
第一手消息請下載on.cc東網
