政改諮詢今個月初展開，學民思潮已拋出公民提名嘅建議，大學生界別暫時未見有乜動靜，學聯就預計明年二月，學「佔領中環」咁搞政改公投月，趁九大院校學生會選舉搭單喺投票時搞埋公投。原來呢個係學聯第二次搞公投，佢哋仲諗住「擺下擂台陣」，向政改三人組牽頭嘅政務司司長林鄭月娥叫陣，希望佢出席學聯大專論壇。
不過，林太以往都試過單人匹馬，舌戰保育皇后碼頭班後生仔，就算真係去都冇有怕啦。
學聯秘書長陳樹暉話，對上一次學聯公投已經係二○○五年，即係約九年前，當年佢哋要求○七年起，特首必須由普選產生，但有啲大學投票率達唔到最低要求，搞到部分院校啲票唔可以計入總票數。今次佢哋就搵埋非學聯成員嘅教育學院，連同八間大學參加，希望有一萬人參加喎。至於題目，現階段傾向簡單問吓要唔要公民提名。至於佔中元旦公投，近日就整咗個手機應用程式，當日用嚟投票。
第一手消息請下載on.cc東網
