郭偉強喺平安夜，上載一條短片，嗌大家聖誕狂歡時都要保持警惕。 （互聯網圖片）
唔少政壇人士都會趁聖誕節發吓賀卡、等選民記住佢，工聯會勞工界立法會議員郭偉強尋日都拍咗段短片，提醒大家喺聖誕狂歡時嘅宜忌，譬如切勿接觸毒品，要小心保護自己，識得向毒品說不，唔好飲陌生人提供嘅飲品，同埋駕駛者要小心啲等等。佢嘅溫馨提示本來好有心思，但郭偉強拍片風格似乎比較簡約，成條片吸引力唔夠喎。
呢段喺平安夜上載嘅短片，主要由郭偉強講嘢，佢除咗喺片末祝大家聖誕節快樂外，大部分時間只係木木獨獨咁坐喺度，即使把聲開心啲又提高八度，可惜背景太靜，同聖誕節嘅熱鬧氣氛似乎格格不入。如果收看者嘅音響設施壞咗，聽唔到佢講嘢，分分鐘以為佢介紹緊自己嘅政綱，睇怕佢下次都要再花多啲心思。
第一手消息請下載on.cc東網
