政壇：電商高層客串送貨員

騰訊旗下嘅易迅網搞咗個「聖誕狂歡優惠」，公司好有橋，出動騰訊電商CEO吳宵光等公司高層親自送貨上門，幸運嘅買家仲可以收到神秘大禮添。

尋日平安夜，騰訊電商一班管理層卻齊齊化身速遞員，喺上海同深圳幫手送貨，收到管理層送貨嘅用戶，仲有一隻騰訊「吉祥物」企鵝公仔做聖誕禮物。作為騰訊電商CEO，吳宵光呢個客串送貨員一眼就畀人認出，佢話送貨直接接觸客戶，聽咗好多用戶嘅意見，當中有讚嘅，亦唔少得畀人彈，佢承諾返去一定會檢討問題，力求做到最好。

內地電商都好興出動高層親自送貨，既顯誠意，又可以好似吳宵光咁順便做埋客戶意見調查，一利兩便。事實上對於今次易迅網出動班管理層送聖誕禮物，網友都係讚多過彈，仲有人喺易迅網微博留言，呼籲馬化騰都客串埋一份。