設計圖片及對白
終審法院早前裁定申領綜援須居港滿七年嘅限制違憲，觸發新一輪中港矛盾大決鬥，其中不滿裁決嘅自由黨，其青年團主席李梓敬已同社區組織協會（社協）幹事兼民主黨（白鴿黨）副主席蔡耀昌連續開火多日，李梓敬尋日更踩上社協何文田辦事處抗議，要求蔡耀昌向自由黨甚至全香港市民道歉。綜援裁決之後，蔡耀昌喺所屬嘅白鴿黨內已遭反對聲音，家吓黨外又被人抽水圍攻，真係「豬八戒」照鏡——裏外不是人。
李梓敬踩上社協辦事處
蔡、李二人日前喺《城市論壇》已激辯過，當時蔡耀昌批評假若右翼變成「法西斯」、排外主義，整個社會都需要警惕。向來自稱右翼政黨嘅李梓敬頓時被「辣」着，認為言論違反《聯合國世界人權宣言》入面有關言論自由嘅精神，尋日仲帶埋青年團嘅兄弟踩上社協辦事處，要求蔡耀昌就「法西斯」言論道歉。
青年團又認為裁決好有可能觸發新一輪骨牌效應，公屋、長者生活津貼嘅司法覆核將陸續有來，庫房開支勢必一發不可收拾，單係新移民申領綜援嘅額外開支，預料每年已經涉款十二億元，對香港福利開支造成沉重負擔，促請蔡耀昌為種下嘅惡果向全港市民道歉。
對於突然有稀客登門造訪，蔡耀昌好合作咁接收請願信後，反駁自由黨係對號入座，拒絕道歉，仲勸自由黨唔好上綱上線，應該多啲做實事咁話。
雖然蔡耀昌今次淪為「豬八戒」專職受靶，但無論雙方喺鏡頭前激戰到面紅耳熱，大家私底下都係目標為本，各自拉票鞏固票源，但相信隨着有人就公屋申請須住滿七年嘅規定提出司法覆核，呢台戲似乎係一套過百集嘅連續劇。至於白鴿黨會唔會重蹈公文袋覆轍，喺港珠澳大橋環評官司同外傭爭居港權案被借題發揮，就睇班老鴿點拆招喇。
第一手消息請下載on.cc東網
