香港工業歷史悠久,由五、六十年代起步,到七十年代登上高峰,譜寫出嘅唔止係堅毅拚搏嘅獅子山下精神,更加係屢創輝煌嘅東方之珠傳奇。可惜,時移勢易,今時今日本土工業自生自滅,瀕臨絕境,莫講話再創經濟傳奇,可能連獅子山下精神呢支歌仔都好快冇得唱咯。

嗱,又有傳統工業被逼上絕路喇。新界洪水橋發展區第二階段諮詢已經喺十月結束,現時正面臨滅村厄運嘅原來唔止非原居民,仲有傳統工業發源地洪屋村。唔講唔知,洪屋村臥虎藏龍,一啲都唔簡單,全港碩果僅存嘅大型船隻車葉鑄造廠就係藏身其中,三十年來,車葉轉不停,年月不停轉,傳統鑄銅技術亦因此得以保留,薪火相傳。家陣港府一句收地,呢間老牌車葉廠隨時「被消失」,傳統鑄銅技術隨時「被失傳」,何止令人無奈,簡直令人心痛。

一「葉」知秋,從車葉廠嘅無奈就睇到本地工業嘅困境。同樣面對迫遷嘅仲有雲石廠等小商戶,由於工序特殊,一般工廈根本無法容身,咁點算好呢?當局只識下逐客令,唔識協助業界覓地搬遷維持生計,咁即係逼人執笠啫。難怪有製造水喉接駁位嘅商戶怒斥,當局冷待本土工業,令工業被迫北移,「到時市民爆水喉,可能要等喺內地切割完至送落嚟咯」!

好心港府唔好咁短視喇,正如有人話齋,工業乃經濟之本,傳統工業式微,老底掏空,今後靠乜嘢維生呢?前特首曾蔭權爵士嗰句「淨係金融業已經可以養起七百萬人」,早已經成為國際笑話,港產官僚唔係咁傻咁天真,以為單靠炒熡炒股就可以令香港繁榮穩定,五十年不變吖?傳統工業係低學歷人士嘅其中一條出路,如果呢條出路愈走愈窄,香港都唔會有運行o架!

所以話,香港深層次矛盾愈來愈嚴重,唔係冇原因o架。回歸十六年,經濟就誤入歧途十六年,一味炒樓炒股,塘水滾塘魚,四碌經濟支柱搖搖欲墜,傳統工業停滯不前,買少見少,市民出路狹窄,上流無望,點會唔谷爆吖。更大鑊嘅係,前朝政府只識吹大經濟泡沫,搞到產業結構單調脆弱,一爆金融危機即無險可守,呢,美國準備退市,加息周期重臨,本港經濟泡沫隨時崩破,蕭條噩夢隨時重臨。

一句講晒,傳統工業敲喪鐘,經濟泡沫一場空。車葉係一隻船嘅推動工具,傳統工業亦係維持本港經濟穩定發展嘅摩打,當局如果繼續執迷不悟,對傳統工業困境不聞不問,盞累香港搭沉船嘅咋,叮!

第一手消息請下載on.cc東方互動iPhone/iPad/Android/Windows Phone Apps