旺角西洋菜街行人專用區即將「殺街」，只限周六、日及公眾假期開放，一眾喺嗰度開檔搵食的工人，話自發組成「街頭兵團」，制訂守則、控制音量和人流、樂隊間保持一定距離等自律行為，望能打動區議會取消殺街決定，佢哋想繼續「開咪」賺錢啫！呢班「兵團」真唔知定假唔知，西洋菜街被人抓到藉口封殺，罪魁禍首，表面係源自歌唱噪音聲響巨大擾民，實則係「一籃子」詭計，借勢剷除呢條香港最大民主街。

西洋菜街緊靠女人街、波鞋街，早已是香港購物名區，唔只西人愛來獵奇，也是內地客掃平貨的必到景點。旺角亦係全港交通樞紐中心，任何層面的本地人，也在此出入，所以，各大政黨、宗教團體和商品宣傳，都集中呢度弘揚佢哋啲嘢，法輪功的攤檔是「駐場」表表者。經常擺檔的政黨，亦以泛民者居多，加上關注社會和監察政府的壓力團體，幾乎日日都有議題開壇，天天公開批評政策失德失誤，其自由度開放過英倫海德公園，咁又點會唔係廢柴無能政府的眼中釘吖？

好嘞！要清剿殲滅拔除心中刺，咪任由呢度九反狂亂囉！老毛嗰句，愈亂愈好，於是易拉架圍滿街，無人執法；大陸人在此擺檔行乞，無王管；老黑陀地搵食，無人舉報；愛字堆打爆人個頭，不了了之；依家，有居民忍無可忍，精神爆煲嘞，咪大條道理摺埋條街囉！

班街頭藝人自保，亦只不過想搵水啫！因佢哋自私兼無知，搞垮咗一條公開表達民情、反映民意、凝聚民心的民主大街，才最大罪呀！可惜，佢哋至今，仍為少咗收入而嘈生晒，真跳海！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

第一手消息請下載on.cc東網iPhone/iPad/Android Apps