依家啲家長好緊張仔女嘅身心發展,有啲變咗怪獸家長添,點樣至可以做個好爸爸、好媽媽,大家可以參考吓法興證券環球股票產品部董事李錦嘅教仔錦囊。

李錦(右二)早前同大仔(右一)去咗柬埔寨踩單車,增進父子了解。

李錦話自己係行動派,無論工作幾忙,都會抽時間身教佢兩個仔。近年仲不斷爭取單對單嘅機會,以增進彼此關係。

佢又話當佢兩個囝囝幾歲大時,已經帶佢哋去天光墟擺賣,幫助弱勢社群之餘,順道教佢哋理財。依家佢哋已經係十五歲同十三歲,除咗一家四口嘅家庭活動之外,又會爭取機會同囝囝一齊食飯、行山、旅行等,好似早前佢就同大仔去咗柬埔寨四日四夜踩單車,增進咗父子間嘅了解,亦觀察到兒子平日點樣待人接物。佢又計劃下年同細仔坐火車穿州過省,甚至橫跨歐亞,聽起嚟又係一次特色之旅。

李錦正計劃寫第三本書,湊成「三部曲」。第一本關於從小教起,第二本講從父母做起,第三本就會集中講兒童理財,希望與父母共勉。

第一手消息請下載on.cc東網iPhone/iPad/Android Apps