城中鏡：何倍倩買禮物有壓力
今年聖誕對恒生新抱何倍倩嚟講可謂別具意義，事關今年家中加添咗一對龍鳳胎新成員，呢個將係一家五口首個共度嘅聖誕節。
成為三子女之母後，何倍倩自言心態轉變。
早前佢為三個子女選購聖誕禮物，為龍鳳胎買咗實用嘅衣物，又為大仔買玩具，佢話每逢大時大節都會買手錶送畀老公，大大話話送過超過二十隻，但佢話老公終於開口示意唔好再送嘞，佢仲笑言為買禮物有壓力添。
以往聖誕節何倍倩都想浪漫度過，自從成為三子女之母後，心態轉變，佢話：「以前就話食candle light dinner，依家有小朋友唔方便，寧願一家人食中菜，老公都話聖誕無人食中菜，唔使訂位，鍾意去邊間就邊間，哈哈。」聖誕已訂咗一間中菜館，何倍倩仲準備喺菜館順道拍攝全家福，節目特別。佢解釋每年都習慣喺大仔生日嗰日影全家福，依家龍鳳胎剛滿半歲，所以趁聖誕一家影番張，感覺更溫馨喎！
