城中鏡：愛心廚神：郭炳江炒飯落足笑料
聖誕節將至，馬灣主題公園挪亞方舟尋日就搞咗個「五餅二魚愛心大行動」，邀請一班弱勢社群同基層人士出席。新鴻基地產主席兼董事總經理郭炳江、馬灣公園諮詢委員會主席Moses鄭慕智同委員Eric李家祥更化身大廚煮愛心親子飯畀小朋友食。幾位大廚表現得雞手鴨腳，笑料百出。
郭炳江險將親子飯變成蛋炒飯。
「製成品」
左起：李家祥、郭炳江及鄭慕智化身廚神宴請小朋友。
郭炳江、Moses同Eric着住圍裙、戴埋廚師帽上陣，而親子飯嘅主角雞肉同飯都係預先煮熟，大家只要將雞蛋同其他食材撈埋就得。喺廚藝導師指導下，三位都表現得有板有眼，但Moses落雞蛋時就係咁攪拌，導師見到即刻婉轉咁提醒佢唔使咁大力。而郭炳江就差啲將啲飯倒落鑊同啲雞肉、雞蛋一齊炒，好彩有導師叫住，否則親子飯就變成蛋炒飯喇。
煮公仔麵最拿手
問佢哋平時有冇落廚，Eric就話同太太係「無飯家庭」。Moses就話平時好鍾意煮嘢食，朋友都好鍾意食佢煮嘅鮑魚。郭炳江就話最拿手嘅係煮公仔麵，成日消夜都會撈埋啲菜一齊煮，好好味咁話。
郭炳江尋日又同幾個基層同殘障年輕人傾偈，佢聽完幾個年輕人逆境自強嘅故事後，聲言返屋企一定要講番畀自己嘅小朋友聽，等佢哋都學習吓人哋嘅奮鬥精神喎！
