政壇：搞搞政：全包睇亞姐騷 KK唔知驚
行政、立法兩會「九男女」暑假接受航空公司款待，攜妻帶女豪遊法國嘅風波，觸發部分議員要求立法會收緊利益申報制度，同限制議員接受款待，認真手尾長。言猶在耳，議員KK馮檢基雖然冇份去法國「收飛機」，但今個月初亦中咗安慰獎。
設計圖片及對白
立會秘書處定期更新議員個人利益登記冊，我哋發現KK最近更新咗資助海外訪問資料，其中一項係應邀出席亞視月初喺東莞舉行嘅《ATV 2013亞洲小姐競選》大中華區總決賽典禮嘉賓，佢更獲節目嘅冠名贊助商，贊助來回香港、東莞嘅交通同兩日一夜食宿，名副其實係「全包宴」。
KK急忙向我哋解畫，稱全家都係來自東莞，其中佢媽媽同贊助商老闆更係東莞厚街鎮嘅同鄉。
由於贊助商有感難得活動場地選址厚街，係厚街人嘅光榮大事，於是邀請份屬半個厚街人嘅KK出席節目。
佢又理直氣壯地承認活動係私人邀請，今次以同鄉身份接受資助睇騷，同議員職務真係冇關係㗎，但佢認為「咁先好」，市民咪唔使擔心佢會收受任何利益，影響議員決定囉。佢仲自爆太太原本都有份獲邀，只係臨時唔得閒冇去到。
不過，佢可能第一次回鄉太興奮，竟然唔多記得當晚節目嘅精彩內容，連一班佳麗來自何方，都要靠估話應該係中國或華南區，查實候選佳麗係來自本港同內地。
