舊年獲委任為觀塘區議員嘅博愛醫院前主席黃帆風,早前喺翠屏邨開咗首個議員辦事處,瞓身投入地區服務。租金貴,唔少議員開辦事處都呻窮,但做廚房用品出口生意嘅黃帆風係有米之人,自然唔使計較咁多。

黃帆風(中)獲太太(左)同朋友方黃吉雯(右)捧場。

不過,仲有唔夠兩年區議會就要改選,到時會取消委任制,咁大費周章開辦事處,唔通係為直選鋪路?黃帆風笑笑口話,冇諗咁多,到時仲要睇吓街坊滿唔滿意佢嘅工作喎!

經常同街坊接觸

當日觀塘區議會主席Bunny陳振彬、健康快車創會主席方黃吉雯同博愛醫院候任主席何榮添都去湊熱鬧。黃帆風話觀塘區居民以老人家居多,佢經常同街坊直接接觸,忙過以前做博愛主席。Bunny就話未來區內最大事件係起動九龍東計劃,到時將創造大量就業機會,希望為區內注入生氣。

第一手消息請下載on.cc東網iPhone/iPad/Android Apps