政壇：黃錦星宣傳片夠騎呢
政府早前展開政改諮詢，講明會力銷年輕人市場，所以諮詢文件小冊子七彩繽紛，又推出政改網站同社交網頁，拍咗幾條片吸引市民瀏覽。不過，啲短片內容八股兼悶蛋，尋日就到環境局局長黃錦星出場，佢一開始竟然叫大家喺聖誕時節珍惜食物，但講講吓突然轉話題叫大家珍惜機會，踴躍就政改諮詢發言喎，呢個轉身真係好騎呢。
設計圖片
聖誕節係普天同慶嘅日子，唔少打工仔仲會放幾日假出外旅遊，或者同家人共度佳節食聖誕大餐。如果有人喺大時大節前夕，叫你珍惜食物，感覺已經少少突兀。如果有人叫你珍惜食物後，又叫你就政改諮詢踴躍發言，真係大纜都扯唔埋囉。不過，偏偏黃錦星做齊兩樣，真係要畀個叻佢。
決策局官員輪住下海
黃錦星幫政府拍嗰條四十幾秒嘅宣傳片，但佢喺頭十一秒都唔出聲，只係飲啖咖啡，然後含情脈脈咁望住送西餅前來嘅女侍應，又冇其他配樂，如果就咁睇差啲以為部電腦壞咗。到佢開聲時，佢就用生硬聲音叫大家珍惜食物，其實佢作為環境局局長，呼籲大家去聖誕派對「惜食」，都係理所當然，但最奇怪係佢無啦啦轉話題，叫大家唔好浪費食物之餘，亦唔好浪費機會，要踴躍就政改諮詢提出意見。
聽聞今次騎呢推銷政改只係第一波，其他決策局官員都要輪流「下海」拍片宣傳政改。政府擅用網上平台推銷政改確係好，但如果好似黃錦星拍得咁老土，內容兼夾騎呢，年輕人好難受落。
