無牌盆菜發大財 無心食署發大夢
冬大過年，大家尋日有冇共敍天倫慶團圓呀？根據傳統，冬至做節寓意陰極陽升，生機勃勃，國泰民安，老百姓一家歡聚食過飯後，就會錢袋豐足，口腹滿足。之不過咁，港產官僚好吃懶做，食物監管甩甩漏漏，市民能夠食完成餐飯都平安無事，都算行運咯。
嗱，本港近年流行以外賣盆菜做節，市場營業額達到億億聲，團購網站開到成行成市。不過咁，呢類團購質素參差，泥沙俱下，情況堪憂。例如，有團購網近月推銷優惠自取盆菜，聲稱以三百九十九元嘅六五折超低價，「一盆嘗盡」鮑魚及海參等貴價食材。點知本報追查發現，製作地點原來係一間無牌工場，盆菜畀人「加料」都冇人知o架。
其實，無牌工場違規製作盆菜，唔係冇人知，只係官老爺愛理不理啫。記者現場查看，發現工場單位重門深鎖，門外貼有食環署本月十三日發出嘅信件，列明該處嘅食物製造廠牌照已被取消。奇就奇在，牌照被取消，盆菜照樣做喎，小小工場堆滿雜物，冰鮮雞就咁用鐵盆裝住放喺地下，與塵土同處，用錫紙包裝好嘅盆菜就咁攤晒喺度，冇任何保障裝置，食咗冇事算你大命。
食環署蜻蜓點水，是但張貼警告信之後就闊佬懶理，冇跟進冇執法，反而上門領取盆菜嘅市民就絡繹不絕，其門如市。「秘」製盆菜貨如輪轉，不法經營者冬至發大財，真係要多謝食環署咯。
喂，食環官僚點把關o架？食物安全唔係講玩o架，無牌工場缺乏監管，衞生惡劣，一個唔覺意搞出一盆毒菌大雜燴，市民咪多得你哋唔少！尤其家陣禽流感肆虐神州，香港淪陷，萬一無牌工場成為防疫缺口，盆菜嘅招牌菜式唔係名貴食材，而係病毒死雞，咁就死得人多o架嘞！
食盆菜講意頭，有魚有肉笑蝦蝦，計太一叮話齋，做節最好嘅兆頭唔係珍饈滿盆，百味俱全，而係食完餐飯後身體健康，平安大吉。太一叮再次提醒官老爺，呢個時候更加要打醒精神，一來禽流感不斷變種，不斷擴散，疫情無疆界；二來咯喎，農曆新年快到，又係盆菜銷售高峰期，市民唔想大時大節入醫院吖！
一句講晒，民以食為天，食以安為先。盆菜係咪有魚有肉唔係最重要，最重要係食得安心，食得開心，市民想平平安安過年，港產官僚就要快啲補番隻鑊喇，叮！
