SUN搞作：網絡小說：香港爭住來
「瓦努阿圖，我想住嘅地方！」小駿低沉道。「仲瓦努阿圖？畀我揀梗係澳門，年年派錢，真係開心快活人！」小賢插嘴道。「澳門有咩好？我哋啲咁嘅人去住，年年派咪即係年年倒錢落海，諗諗吓都係美國好，可以呼吸自由空氣。」小駿一臉憧憬。
「畀人監聽，仲叫自由？而且又要提防恐怖分子，真係你住埋我嗰份！」小賢再續說︰「既然度度都唔得，北上可能都係個好選擇，發展勢頭咁勁，擺脫頹廢生活指日可待。」小駿一臉不屑，「呼吸唔到自由空氣都算喇，日日都要吸霧霾廢氣，擺脫到頹廢，都頂唔順殘肺喇！」
「唔通呢個世界上真係無安居樂土？」小駿小賢不禁嘆氣。此時小明行近，「傻的嗎？香港咪最好囉！又包容、福利又好，最重要提倡人人平等！」小駿小賢愕然，「我哋住咗咁耐，點解一啲都唔覺？」
「梗係喇，你兩個都唔係新嚟嘅！」
