SUN搞作：少膽虫手記：職業造假
「少膽虫，即刻入嚟！」一聽到淫賤黎宣召，少膽虫雖然喺廁所做緊正經事，但都惟有即時「溫拎MAN」上身，着番條褲狗衝入腦細房。「腦細有乜吩咐呢？」淫賤黎望住個日曆嘆咗聲︰「唉！就嚟又到聖誕節，你同我諗吓有乜活動搞，費事一陣班細嘅又話喺壹全霉打工乜福利都冇。」
「不如搞番個員工短線旅行團，齊齊happy吓吖！」淫賤黎聽完即刻嗌出嚟︰「黐線！《爛果》印一份蝕一份，仲邊有閒錢搞乜鬼旅行團！」一早估到淫賤黎又要威又要戴頭盔，好在少膽虫早有準備，「腦細唔使擔心，只要我哋去完後死口話行程貨不對辦，賴死要旅行社假一賠十，咁到時咪可以免費遊埠兼倒賺囉！」
「你點做腦腫o架？」淫賤黎一邊起勢篤少膽虫個頭一邊鬧︰「《爛果》出晒名成日造假，到時個個攞住份報紙嚟要我假一賠十咁點算？你用吓腦啦！」話音未落，房入面又再傳出「啪啪」聲，相信唔使講大家都知發生乜嘢事……
