城中鏡：姚珏信囡囡拍拖會講
著名小提琴家姚珏前晚以表演嘉賓身份現身灣仔舉行嘅酒會，仲透露呢次演出係慈善性質，為咗演出抽唔到時間去外地接囡囡返港，佢話：「囡囡自己返港，因時差問題出席唔到。」佢又透露十六歲嘅囡囡今次返港同家人共度聖誕節，又笑言：「一家人可以聚吓囉！」
姚珏透露囡囡暫未有拖拍。
問到愛女拍拖未？姚珏坦言仲未，記者笑問係咪女兒唔敢話畀佢知拍拖嘅事時，佢話：「唔會，佢乜都同我講！佢暫時冇人追，佢好清楚依家要專心學業，而佢兩年後要考大學。」佢又話：「當年個女去美國讀書都有陪佢開學同面試，我乜都幫佢準備！」
