城中鏡：廠商教投資抗衡美退市
日前美國聯儲局落實退市，港股應聲下調，多個屋苑價格愈劈愈深，人心惶惶，明年經濟係咪危危乎？城中廠商名人就話未必喎，齊聲認為退市係利多於弊，反映美國經濟穩步向好，又預測本港市況縱有調整，但唔會大冧市，大家無需太恐慌。
陳國民（右二）贊助烹飪比賽，好友吳宏斌（右一）、楊志雄（中）、黃家和（左二）同陳明耀（左一）齊擔任評判支持。
評判落足眼力睇參賽家庭大顯廚藝。
鍾志平下月初將帶一班青年工業家考察以色列，尋求新發展機遇。
陳詠梅大力推動開心機構文化，呼籲企業老闆營造融洽歡樂的工作環境。
尋日冬至，維園工展會人頭湧湧。中華廠商聯合會同香港提升快樂指數基金齊合辦「親子烹飪比賽」，搵嚟城中一班識飲識食的廠商擔任評判。德國寶創辦人陳國民、餐飲聯業協會會長黃家和、廠商會副會長楊志雄、會員陳明耀，同埋提升快樂指數基金主席吳宏斌齊組成星級評判團。試味做評判，難唔到大家，部署明年生意方向，先至最頭痕。
黃家和教人買酒莊
不過，陳國民就大派定心丸，話：「香港地，年年都有睇唔通嘅因素，話難過咪又係年年過。」佢話來自周邊地區嘅競爭，反而要打醒十二分精神，會先做好自己，迎接突如其來嘅新對手。工業總會前主席鍾志平都對明年經濟表示樂觀，佢話美國步入加息周期係意料中事，希望加息步伐能循序漸進。業主供樓負擔重咗，無疑影響入市意欲，但他相信香港土地供應量有限，縱有調整，亦唔使太驚青。
至於明年投資乜嘢好呢？黃家和就話：「梗係買酒莊啦！」佢笑言，歐洲仍有唔少平價投資機會，會密切關注葡萄牙、西班牙及意大利樓市。男士滿腦生意經，提升快樂指數基金總幹事陳詠梅就享受進修生活，明年將推動企業提倡開心企業文化，鼓勵老闆們多與員工溝通，放手讓同事發揮所長，營造融洽歡樂嘅企業文化。
