政壇：劉秀成教速寫培育青少
立法會前建築、測量及都市規劃界議員劉秀成熱愛攝影同速寫，任議員時多次以個人嘅速寫作品製成月曆贈予新知舊雨。卸任後，佢除咗繼續做好其建築專業外，仍到處旅行速寫，更義務教小朋友點樣透過一支鋼筆去記錄生活中睇到嘅一幢樓、一片好風景。
劉秀成閒時會教小朋友速寫，記錄生活中睇到嘅好風景。（受訪者提供）
唔少本港古舊建築物同中國著名古蹟都係劉秀成筆下題材，三兩個月前佢先至同朋友去完武當山旅遊。佢話：「影相嚓一聲幾秒就完，速寫至少要幾分鐘，甚至一個鐘，可以培養觀察力同專注力。」
方氏基金會早幾個月前邀請佢擔任青年藝術發展計劃工作坊，教兒童同青少年速寫，學生由七、八歲到十幾歲都有。
劉秀成會讓學生在畫室畫雕塑，靜物，亦計劃帶他們到戶外練習，但太細個就唔帶喇，因為好難照顧。佢笑笑口話早前喺畫室上課，叫一個小男孩練習畫一件藝術品，結果小男孩畫咗空中飛人。
除咗教小朋友速寫，佢仲重返香港大學教書，話自己七十歲嘞，教書可以常常同年輕人一起，覺得自己都年輕啲，開心啲。
