政壇：政改三人組拍片多蝦碌
政府喺月初就政改諮詢拍咗段三十秒宣傳片，由政務司司長林鄭月娥、律政司司長袁國強同政制及內地事務局局長譚志源「政改三人小組」粉墨登場。事隔近三個星期，政府前日失驚無神上載宣傳片嘅拍攝花絮，收錄三位司局長嘅蝦碌鏡頭，有貼近三人嘅消息仲踢爆，一句八個字嘅宣傳口號仲玩謝佢哋添！
林鄭（中）唸唸吓對白「笑場」，身旁嘅袁國強（左）同譚志源（右）都忍唔住笑。（互聯網圖片）
三位司局長平日見慣世面，區區一條宣傳片當然冇怯場，但一分鐘「花絮」只係拍吓三人鏡頭後嘅準備工作，好似有工作人員問袁國強邊個會拍得最好，袁國強即時推舉平日好talk得嘅譚志源，但譚志源就話第一次拍政府宣傳片其實好緊張，事關拍住兩位司長壓力好大喎！
當日有份「傍」住三人落場嘅消息人士透露，片尾三人齊聲喊出「有商有量，實現普選」呢短短幾秒就NG咗至少十幾次。消息人士歸咎香港空中交通繁忙，不時有民航機同直升機喺上空飛過，影響收音，力撐三人其實好合拍o架。其實佢哋當日要一口氣完成宣傳片拍攝、電台宣傳聲帶同宣傳硬照嘅工作，算係快手快腳o架喇。
