政壇：鬍鬚曾又靠嚇做守財奴
財爺鬍鬚曾做咗咁多年預算案諮詢，以前好興自己粉墨登場拍短片宣傳，但今年改為搵人搞咗一連十集嘅動畫短片（圖）。咁樣做美其名話係改變佢都形容為「票房毒藥」嘅八股宣傳片，但係冇改到「靠嚇」嘅伎倆。首集講到明要「有備無患」，話雖然有幾千億財政儲備，但係一年埋單同樣有幾千億開支，而儲備唔單止可以捍衞港元，仲講番十年前沙士時政府收入唔穩定，要靠食老本解困，即係繼續做守財奴，就算下年預算案派少咗糖，都唔會被人掟蛋嘛！
設計圖片
鬍鬚曾尋日喺網誌撰文，話目前預算案諮詢工作已經接近尾聲，為咗等公眾可以更加了解政府嘅公共理財哲學，同埋等討論可以更加聚焦，今年會再次製作宣傳片，但今次佢就選擇拍動畫。佢解釋，以往短片用大氣電波播放，片長有限制，除咗呼籲市民發表意見，就好難增加其他內容，但佢希望可以解釋一啲公共財政基本概念，好似量入為出嘅重要性、人口老化對財政同埋經濟的影響、財政儲備嘅用途、政府嘅收入結構、口頭禪「應使則使」到底所謂何事。
期待網上高手「招呼」
加上做咗咁多年，佢都承認公共財政唔多有趣刺激，有時反而好沉悶艱澀，要吸引市民眼球，畀大家聚焦並深入理解，就唔多容易。所以佢就開咗個YouTube頻道「Johnny財政博客」，做咗十段動畫短片，每條短片大概一分鐘，隔日上載，每集講解一個理財概念，貼近年輕一代嘅生活。
唔知係咪以往多年啲短片都被人惡搞得多，今次冇粉墨登場，佢自嘲預期一班鍾意「二次創作」嘅網上高手可能因此感到失望，又話見識過各路高人嘅大作，好期待睇到動畫會畀網民點樣「招呼」，名副其實打定底先。佢仲挑機話若果反應熱烈，「博主」Johnny會喺適當時候現身，同大家互動喎，大家又估吓Johnny幾時會現身啦！
