旅霸得寸進尺 絕對不能姑息
香港號稱旅遊之都，強調好客之道，不過咁，好客之道唔係姑息養奸。嗱，隨着訪港旅客愈來愈多，旅遊糾紛不斷增加，當中唔少固然係本港嘅問題，例如黑店劏客及惡導遊等等，但亦有部分係旅客無理取鬧，絕對唔可以姑息o架。
尋日一批內地旅客因為部分人簽證出問題，未能繼續行程去台灣旅遊，滯留落馬洲口岸拒絕離港，並要求賠償。結果部分團友願意接受旅行社賠償五千蚊人民幣及回程機票，返回深圳，剩低幾十人繼續「留守」。呢班人除咗「聲討」香港旅行社呃人，又獅子開大口，要求賠償十倍旅費，仲揚言如果本港旅行社唔應承就絕食，甚至要操去政府總部示威喎。
喂，示威都要講理由o架，香港係法治之區，凡事都要合情合理合法，唔係靠惡、靠無賴就得。正所謂，冤有頭，債有主，旅行團簽證出問題係因為部分人被台灣列入「黑名單」，呢方面應該由內地旅行社負責，根本唔關本港旅行社事，玩老屈唔該搞清楚對象先喇，叮！
其實，香港對呢班旅客已經算係仁至義盡，警察送上食水食物，旅遊業議會亦送上其他物資，仲想點吖。正如有人話齋，如果呢班內地客咁夠膽，不如索性踩上北京包圍中南海吖，笨！
講開又講，近年「旅霸」事件頻頻發生，每月平均有十幾單，藉口五花八門，令人啼笑皆非。有人錯過直通火車，要「佔領」港鐵站；有人話唔見咗副假牙，要求退團費。無賴見得多，但從來未見過咁無賴。
好佬怕爛佬，爛佬怕潑婦，潑婦怕旅霸。部分旅行社為求息事寧人，面對旅霸無理取鬧，往往賠償了事，以為花錢消災，結果令佢哋更加有恃無恐。
呢，今年五一黃金周有個內地團不滿旅遊巴遲到一粒鐘，又過於擠迫，居然拒絕上車。有人向旅發局及旅議會投訴嫌唔夠，仲走去報警，對住記者鏡頭喊到聲嘶力竭，後來先至搞清楚，原來佢哋要討回嘅「公道」係每人賠償三千蚊，另加三晚免費酒店住宿，仲狼過華秀隻狗，同勒索有乜分別？
話時話，部分內地客嘅不文明行為好似隨地吐痰、排隊打尖等等，本來就令人側目，再加埋無日無之嘅旅霸惡行，你話中港矛盾有乜辦法唔愈來愈惡化吖。歪風不可長，旅霸莫姑息，對呢類無賴之徒一定要企硬，你愈想息事寧人，佢愈得寸進尺，今次賠五千，下次賠五萬，香港遲早畀人玩殘嘅咋，叮！
