SUN搞作：少膽虫手記：買電視
「哎呀你個王百科！」淫賤黎又喺房捶胸頓足發癲大叫：「你條友要買電視呀、頻道呀，做咩唔搵我！係人都知我有大把電視喺手要賣！」少膽虫在旁恭聽聖訓，自然已將上意揣摩個八九成。
「腦細，我哋當初仲捧到佢上天，做晒英雄攞晒彩，家陣呢？竟然走去同阿爺買條山寨頻道都唔幫襯你！又話唔搞網絡電視，結果呢？咪玩語言偽術搞流動電視囉！我哋壹於反轉豬肚，煮重佢米！」少膽虫交足戲，慷慨激昂，幾乎連自己都畀自己感動。
「啪啪啪啪啪啪！ 」熟悉嘅聲音又再響起，少膽虫泛紅一片。「你都戇居居！」淫賤黎怒不可遏：「如果不是中央，香港完蛋了！壹全霉唔係有中央可以反，少膽虫你仲可以日日hi-tea？」少膽虫估唔到，連淫賤黎都染紅埋，慨嘆港人仲成日覺得有超人打救世界，真係傻的嗎？
「咁我哋《爛果》點報道好呢？」少膽虫出於實務考慮，都要問問，點知淫賤黎答：「照舊啦，咪學第一大黨咁：王百科抗爭見成果，成功爭取有電視睇！」
