潮語「PS圖」或「PS」意思係一張經電腦技術加工過或修改過嘅相片，「PS」即係電腦執相軟件PhotoShop嘅簡寫。一般改圖改相都係用呢套軟件去做，所以依家見到一啲用PhotoShop執過嘅相都會叫做「PS圖」。

網上有句名言︰「認真便輸了。」呢句話真係真過真理！因為喺互聯網時代，每個人都有權發表，寫乜講乜都有自由，網民嘅言論或者消息到底有幾多成真幾多成係假？已經唔係太重要，最緊要係寫嘅過癮睇嘅開心就算。加上網上啲身份都未必係真身，寫完又唔使負責任，對網上嘅嘢太認真，確實係搵自己笨。仲有好多網上嘅圖片，好似周不時有啲明星艷照，望起上嚟真嘅一樣，但其實只不過係經電腦修改嘅圖片，完全只屬騙案一宗。最好笑嘅就係竟然有內地嘅地方官，發表一啲巡視地方嘅照片，但後來被人發現係「PS圖」！仲要係質素差劣，穿崩位畀人睇到晒。造假都要講技術，呢啲地方官連造假都造到咁，真係要拉去勞改。

本來PhotoShop係廣告界設計界最常用嘅軟件之一，大家見到美容廣告上面嗰啲女星女模完美無瑕嘅面孔，當然唔係啲護膚品嘅功效，而係美術人員用PS執相執出嚟嘅功效。後來PS技術普及化，人人都可以喺屋企將啲相改頭換面，將個人拉長撳扁，或者將啲明星頭key落另一個身嗰度，之後再放上網，娛人自娛一番。據聞當年唐英年選唔到特首，都係因為「PS圖」！真係信不信由你。但好似北韓領袖金正恩好多巡視國家嘅相都係「PS圖」，可見PS技術真係人類另一項偉大發明。早排見到國產嘅嫦娥號太空船，帶住玉兔太空車登陸月球。其實電視播來播去都係一啲電腦模擬畫面，令人聯想到其實嗰啲月球影像會唔會都係「PS圖」？不過以強國造假能力，真係PS又有幾咁奇？50年前美國人漫步月球都有人話係廠景加荷里活特技，月球呢啲地方，你同我都唔會有機會去過，真假又有邊個知？真作假時假亦真，都係嗰句……認真便輸了!

第一手消息請下載on.cc東網iPhone/iPad/Android/Windows Phone Apps