政壇：策發會騎呢建議好惹火

上個月三十號開嘅第三次會議中，有成員建議港府同中央政府研究，將市區軍事用地搬去其他地方，同埋考慮喺離島興建超級監獄，早前政府諗住將中環海濱長廊部分用地劃作解放軍軍用碼頭，都面對唔少反對聲音，反對人士仲喺城市規劃委員會嘅諮詢會拉布，難怪政府就斬釘截鐵話軍事用地唔郁得。至於超級監獄，早在十年前政府已諗過喺喜靈洲起，點知就畀人話破壞自然生態。

最騎呢嘅建議就係叫政府搬寫字樓，政府總部同立法會都係前年先搬入添馬艦，櫈都未坐暖就叫人再搬？仲有委員話，中西區嘅僱主好難請工人做基層工作，皆因該區冇公屋，令人口結構失衡。佢唔通要政府喺中上環起公屋？好心三思先講啦。