政壇：四叔捐地博愛游說半年
博愛醫院日前舉行慈善餐舞會，一眾負責人落力籌款。今年博愛可以話係大豐收，早前恒基地產主席「四叔」李兆基豪捐屯門藍地一幅十萬呎地皮畀佢哋興建長者設施，市值至少過億，令其他慈善團體羨慕不已。博愛主席曾耀祥話，其實幅地係佢哋辛苦爭取返嚟，唔係從天而降嘅。
曾耀祥話經高人指點下，佢哋喺政府拒絕四叔捐地建議後立即主動接觸四叔，經過半年努力，先至成功說服四叔將塊地皮捐畀博愛。依家佢哋搵緊顧問公司，撰寫詳細嘅規劃報告，除咗已公布興建全港最大嘅老人院之外，仲會發展其他社會服務，下一步將向社署申請獎券基金撥款承擔建築費用。
當晚博愛前主席兼圓玄學院副主席湯修齊（Henry）一家四口都到場，Henry同囝囝Harris父子檔登台獻唱，誠意十足。
