政壇：三政助救火叻過上司
官場早排爆跳船潮，第二梯隊成為眾矢之的，尋日三個官場奀星亮相備受關注。政制及內地事務局政治助理陳岳鵬尋日出席一個電台節目，教育局政治助理施俊輝及民政事務局政治助理徐英偉就拍檔現身同青少年交流，雖然佢哋嘅對手都係年輕人，但幾個官場第二梯隊成員就做足功課，一番救火演示後，陳岳鵬雖然喺尖銳提問下搞到一面灰，但都冇出事；施俊輝同徐英偉亦冇甩漏，表現仲被讚好彩唔似佢哋嘅局長上司吳克儉同曾德成喎。
設計圖片及對白
貪曾「起錨騷」唔使兼聽
陳岳鵬尋日被問到二○一七年嘅行政長官選舉方案係咪終極方案？佢即刻話目標係一人一票，然後生動比喻：「就好似女士減肥咁，好多女士們過咗聖誕節就會訂減肥目標，定咗個磅數，就會努力達到目標，但唔代表去到呢個目標就唔再減嘞！」咁點解今次冇好似上屆政府咁「起錨」政改騷呢？
佢答得巧妙，話「起錨騷」係因為當年已有特定方案，要爭取立法會同各界支持，因此政府採用「激情手法」，但今次政改只係首階段諮詢，未有任何具體方案，所以採取開放兼聽態度聽意見。貪曾曾蔭權當年嗌晒高官陪佢落區，「青筋暴現」咁大嗌「起錨！」，依家睇番，前朝係咪唔夠開放，唔得兼聽呢？
另一邊廂，就見施俊輝同徐英偉齊齊出席東九龍居民委員會舉行嘅「我對施政報告的期望」交流會，同二十多名學生交流，做過通識科老師嘅施俊輝好淡定，準備定貓紙，答得有理有據；做民政嘅徐英偉就講到近日居港未夠七年人士可攞綜援判案嘅影響，仲引導學生多角度思考添，三個官場新人都交到貨，唔通熱廚房已轉趨穩定？
