水管一年爆八次 官僚無能累街坊

點解無緣無故又爆水管？係咁嘅，渠務署外判商進行污水收集系統改善工程，居然唔小心掘爆地底一條直徑十五吋鹹水管，射出嘅鹹水一柱擎天，成條人工瀑布咁款，成為名副其實嘅「水街」。最無辜嘅係，附近一幢大廈畀沖天水炮兜頭淋，二樓至八樓共二十一個單位慘被波及，有人睡房變成水塘，有人家具電器盡毀，有人甚至連床褥都浸埋，認真無奈。

即係咁，爆水管唔止擾民，仲累到居民損失慘重，賠償乃係應有之義，之不過咁，財物損失可以用錢彌補，精神損失又點計先？正如區議員話齋，水街一帶一年爆足八次水喉，居民不勝其擾，如果當局真係知衰，快啲更換晒啲老化喉管好過喇。講起都好笑，水務署承諾水街嘅街坊明年初會換新主喉，但工程居然唔包換支喉，等如拆炸彈拆一半留一半，你話係咪靠害吖。所以話，今次呢支沖天水炮可能係意外啫，但係其他無日無之嘅鬧市噴泉絕大部分係人禍。

嗱，話口未完，將軍澳一條老爺地底鹹水管又谷爆嘞，大量鹹水破土而出，直衝上三十米高空，簡直蔚為奇觀。

話時話，老化殘舊、日爆夜爆嘅點止鹹水管吖，食水管一樣爆不停o架。係人都知，水務署係全港最浪費食水嘅敗家仔，明知水管老化都唔嗲唔吊，既唔從速更換，又唔勤於維修，結果水管日漏夜漏，左爆右爆，每年糟蹋嘅食水估計數以億立方米計，涉及大量公帑。喂，新移民綜援案拗到面紅耳熱，就係拗公帑係咪用得其所，「水皮署」年年將大量公帑倒落鹹水海，你話係咪折墮吖！

講到呢度，太一叮想提醒新任署長林天星，水務署十三年前已誇下海口，喺一五年或以前完成更換全港老化喉管，眨吓眼限期就快到嘞，工程進度如何呢？閣下如果唔想淪為箭靶，就要醒醒定定，唔好再做糟蹋食水嘅敗家仔。

路邊日日爆水管，市民激到爆血管。水街爆鹹水管，外判商固然要承擔賠償，咁負責監管嘅渠務署又有冇責任吖？唔通你哋可以若無其事？叮！