SUN搞作：打橫嚟講：香港陸沉，由今開始！
為免被一眾「低B界」持份者誤會，因怕佢哋欠缺對文化研究的文本理解力，而作出胡亂猜想，所以，在此嚴厲聲明，本文絕無對任何人（包括大陸人）有任何歧視成分，只作極度具理性的論析而已！若有是非者，便是是非人。先此申報。
嗱！由呢一秒起，任何一個話「新移民居港一年可攞綜援」係對香港無影響的人，我會睇佢哋唔起，太自欺欺人了！連台灣Fans多過香港的掃把頭也急忙撲出來搶白說裁決會吸引更多居港不足七年的新移民攞綜援，佢更憂心因此構成政府財政壓力呀！哼！話口未完，就見「申請潮」暴現，仲有新移民話「趕新年有糧出」添！
嗱！我再講一次，本文絕非不滿去申請攞錢的新移民，因有啲人確係有切實需要搵錢應急的；但一直以來，香港勞福局對申批個案不是鐵板一塊，好多時有行使酌情權救急扶危的，只是今劑「違憲」裁決，造成的社會震盪和矛盾，將會再無法平息啫！
現今，有不少申請單程證的新移民，多以來港團聚為由。好！看看這Case先：在大陸「離過婚」的孔女士，「再嫁」來港給七十多歲的本地老翁。抵港一日，老翁離世，孔女士在此頓變「無依無靠」。
另一場景，孔女士在大陸有屋有樓的，但佢話畀兩個與前夫所生的兒子霸咗嚟住緊，咁！呢間屋嘅業權即是仲係屬於孔女士的吧！同時期，佢又申請埋霸佢間屋嘅「不孝子」來港「團聚」呀！噢！已經獲批單程證嘅「不孝子」，原來三十多歲的了！遲啲又申請埋老婆嚟？喂！你哋一家要團聚，點解唔團喺大陸呀？大佬！
香港陸沉，由今開始。立此存照。
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
