SUN搞作：少膽虫手記：本性難移
淫賤黎神色凝重叫少膽虫入房，「先天下之憂而憂……」少膽虫當堂一呆，淫賤黎都愛吟詩作對？「少膽虫，我決定起一座值六十億嘅『反恐大樓』！」生平以亂港禍國為己任嘅淫賤黎竟然講啲咁嘅嘢，少膽虫即刻挖挖耳仔，生怕自己聽錯。
「其實，我一早已經有呢個打算，作為《爛果》腦細，應該當仁不讓。」淫賤黎一副語重心長嘅樣，少膽虫即時跟風，「講得好，我一向都覺呢樣嘢係匹夫有責！」「不過……」淫賤黎欲言又止，少膽虫當然打蛇隨棍上，「腦細，除咗錢之外，我咩都會幫你！」淫賤黎搭搭少膽虫膊頭，「好！其實我只不過係差啲志同道合嘅盟友……」
淫賤黎未講完，少膽虫已經九秒九咁拎起個電話，「喂！喂！唔該係咪中……」又係一個巴掌，「少膽虫，我反孔子宣淫，你仲搵強國？」少膽虫一臉驚訝，「吓？反孔？腦細你啱啱先吟詩作對喎！」
淫賤黎竊笑道︰「你都識講『淫詩作對』喇，唔反孔宣淫賺大錢，點有得歎世界，先天下之休而休呢？」
